Lalaki patay sang ginbuno sang pangayaw sa Lambunao

ILOILO — Patay ang 36-anyos nga lalaki sang ginbuno sang pangayaw sa Brgy. Pandan, Lambunao pasado las 9 sang gab-i sang Hunyo 7.

Suno kay Police Staff Sergeant Jessie Fusin, imbestigador sang Lambunao Police Station, naga-inom sa separado nga lugar ang biktima nga si Danilo Pastolero kag ang mag-utod nga Romel, 24-anyos, kag Ronel Gardose, 29-anyos, sang Tapaz, Capiz.

Pauli na ang biktima sa ila balay sang nalabayan niya ang lugar nga gina-imnan sang mag-utod.

Ginpahayag ni Fusin nga indi pag-intiendihanay ang rason sang pagpangbuno. Indi kilalahay ang biktima kag ang mag-utod.

May nagluntad suno sa iya nga pagbaisay sa tunga sang biktima kag ni Ronel Gardose kag nagtambag ang utod nga si Romel.

Nag-ugat ang pagbaisay sang ginpasigahan sang suga ang biktima samtang nagalabay sa lugar.

Si Romel ang nagbuno sa biktima nga napilasan sa wala nga parte sang ulo kag tuo nga paa, suno pa sa pulis.

Yara na sa kustodiya sang Lambunao Police ang mga suspetsado.