USAR Chief temporaryo nga nag-drive sa water tanker truck nga nakadalasa sa mga by-standers sa Baldoza La Paz — CDRRMO Head Donna Magno

Ginkumpirmar ni City Disaster Risk Reduction and Management Office (CDRRMO) Head Donna Magno nga chief sang Urban Search and Rescue (USAR) ang lalaki nga temporaryo nga nag-drive sa water tanker nga nakadalasa sa pila ka mga by-standers sa Baldoza, La Paz sang Domingo sang hapon

Una na ginkilala ni Lt. Col. Ethan Estaya, head sang Traffic Management Unit sang Iloilo City Police Office ang USAR chief kay Darryl Darwin Thulasidas.

Suno kay Magno, nakahibalo magmaneho sang salakyan si Thulasidas tungod level 3 ang iya restriction sa iya driver’s license.

May mga international licenses man siya bilang rescuer, dugang pa ni Magno.

Ginpahayag pa niya nga padayon sila nga nagapaninguha sa CDRRMO agud mahatag ang maayo nga serbisyo sa publiko.

Ginpasalamatan man ni Magno ang suporta sa ila ni Iloilo City Mayor Jerry Treñas.

Nahibaluan nga una nga naglamsot ang preno sang tanker kag nakabunggo sa tricycle, lechon stand, kag botika. Pero sang ginguyod na ini sang rescue truck sang CDRRMO agud mapahigad, hinali ini nag-andar kag nadalasa ang mga nagatindog sa higad sang dalan.

Duha ang napatay kag 17 ang pilason.

Napaidalum sa CDRRMO ang USAR.

Ginatinguhaan pa sang Aksyon Radyo Iloilo nga makuhaan sang statement si Thulasidas.