Masobra P5-million nga balor sang illegal drugs na-recover sa Bacolod City
Bacolod City, Negros Occidental — P5,400,000 nga balor sang illegal drugs ang na-recover sang Bacolod City Police Office 8-Station Drug Enforcement Team (SDET) kag Special Operation Unit 6-PNP Drug Enforcement Group (PDEG) sa drug buy bust operation sa Purok Villa Lourdes, Brgy. Pahanocoy, Bacolod City la-una kaina sang kaagahon.
Ginkilala ang subject kay alyas Ombap, 26-anyos kag ginakabig nga High Value Individual (HVI).
Nakuha sa subject ang 11 ka sachets sang suspected shabu lakip na ang buy bust item kag dugang nga pito ka dalagku nga plastic sachets sang illegal drugs.
Sa kabug-usan, ginabanta nagabug-at sang 800 grams ang nakumpiskar nga illegal drugs.
Magluwas sa illegal drugs, na-recover man sa subject ang digital weighing scale, sling bag kag P3,000 nga buy bust money.
Preso na sa Bacolod City Police Station ang subject kay natalana pasakaan sang kaso.
Ginkalipay naman ni Police Regional Office (PRO) 6 Director PBGEN Sidney Villaflor ang pagkadakup kay Ombap nga ginakabig pinakadaku nga accomplishment sa kampanya kontra illegal nga druga sa Western Visayas.
