Graduating student nag-alegar nga gin-abduct sa Jaro kag ginwigit sa San Miguel, Iloilo rason nga wala naka-attend sa graduation

ILOILO – Wala nakatambong sa iya graduation ang 19-anyos nga senior high school graduating student nga lalaki tungod nag-alegar nga gin-abduct sang lima ka mga lalaki sa Libertad-Santa Isabel, Jaro kag ginkarga sa van mga la-1 kahapon sang hapon, Hunyo 19.

Sa interview sang San Miguel kag Jaro police, ginpahayag sang estudyante nga ginwigit siya sa Brgy. San Antonio, San Miguel, Iloilo.

Suno sa estudyante, mapa-cash in siya kuntani sa GCash sang natabo ang pag-abduct sa iya. Ginsaysay niya nga nagatindog siya sa higad sang karsada, sa likod nga porsyon sang Save More Jaro sang ginpalapitan sang duha ka mga lalaki kag ginpasul-uban sang garbage bag antes gintuwangan pasulod sa van.

Ginabanta sa lima tanan ka mga lalaki ang sakay sang van, lakip ang mga nag-pick up sa iya kag ang nagamaneho sang salakyan. Sang ulihi nabatian niya suno sa iya nga may naghambal nga isa sa mga sakay sang van nga “daw indi man na amo si Roland” tubtob nga ginsipa siya paguwa sa van kag ginwigit.

Gilayon siya nga nagtawag sa iya tiyo para magpangayo sang bulig kag mga las-2:30 na sang hapon naka-report sa police sa San Miguel.

Sa interview naman sang Aksyon Radyo Iloilo kay Alyas Nene nga iloy sang soltero, nagahimos na sila kuntani agud magkadto sa eskwelahan para sa graduation sang iya bata apang wala na nadayon tungod sa natabo.

Ika-16 sa mag-ulutod ang estudyante kag honor student pa, suno sa iloy.

Nagpangabay ang pamilya sang tagreklamo nga indi na sila paghingadlan para sa ila seguridad.

Nagapadayon naman ang imbestigasyon sang kapulisan may kaangtanan sa alegasyon lakip na ang pag-check sa kuha sang mga CCTV cameras sa lugar nga posible gin-agyan sang van.