Presidente sang Julix Taxi Transport Corp. nagkumpirmar nga driver nila ang lalaki sa viral video nga ginreklamo nang-harass sang transgender nga pasahero
ILOILO CITY—Ginkumpirmar ni Mr. Felix Jagolino, Jr., presidente sang Julix Taxi Transport Corp. nga ila driver ang lalaki nga ginreklamo nang-harass sa pasahero nga transgender nga nagpadul-ong sa Progreso, Lapuz pasado las-4 sang hapon sang Lunes, Hunyo 19.
Suno kay Jagolino, gin-ako sang taxi driver nga siya ang lalaki sa nag-viral nga video. Nag-text sa iya ang driver kaina sang udto.
Ang driver residente sang isa ka banwa sa probinsya.
Gin-claim sang driver, suno kay Jagolino, nga ang transgender ang una nga nagpakita sang motibo. Base sa text message sang driver kay Jagolino, wala sila nagsugtanay sang transgender sang ginsukot niya sang P1,000.
Wala na nadetalye sang driver kun ano ang buot niya silingon sa suktanay, pero wala suno sa iya nagpasugot ang transgender nga mabayad.
Samtang nagamaneho ang driver, ginpahayag niya nga natalupangdan na lang niya nga gina-video na siya sang transgender.
Kaina lang sang aga nahibaluan sang driver nga nag-viral sa social media ang video nga ginkuha sang transgender rason nga nagpalagyo siya tungod nahadlok nga mahuy-an, suno pa kay Jagolino.
Wala nagpakita ang driver sa ila opisina sa Brgy. Balabag, Pavia kag wala na gin-surrender ang unit sang taxi, pero nagpahibalo siya kay Jagolino nga ginbilin niya ang taxi kag ang liyabe sa compound sang lodging house sa Molo.
Suno pa kay Jagolino, tatlo na ka adlaw nga wala na-remit sang driver ang income sang taxi tungod diyutay lang ang pasahero.
Gin-aku ni Jagolino nga wala sa listahan sang mga taxi drivers nga may malain nga record ang nasambit nga driver nila, pero base sa iya pagpangusisa sa mga taxi companies nga ginhalinan niya, ginlaragway nila ini nga “weird.”
Mayo lang sang nagsugod sa pag-obra kanday Jagolino ang driver pero naga-untat-untat. Suno pa kay Jagolino, sang nagligad nga semana lang liwat nga nagbiyahe ang driver.
Gin-athag man ni Jagolino nga ginmanduan niya ang driver nga magsuksok sang uniform nila nga dilargo, pula nga polo shirt, tag sang ila taxi kag closed shoes.
Background: http://bitly.ws/J3eS
