Mga Badjao nga na-rescue sa Iloilo naka-abot na sa Zamboanga

Naka-abot na sa Zamboanga ang mga Badjao nga na-rescue sa Iloilo City kag Dumangas.

Ini ang base sa pagpangusisa sang Department of Social Welfare and Development (DSWD) 6 sa DSWD IX kahapon sang aga, Hunyo 27.

Temporaryo nga nagatiner ang mga Badjao sa DSWD Processing Center for Displaced Individuals, suno sa ahensya.

Suno kay DSWD 6 Regional Director Atty. Carmelo Nochete, gina-facilitate na sila sang DSWD Protective Services Division upod sa Task force Reach Out, ang inter-agency task force nga gintukod sa pagresponde sa mga kinahanglanon sang mga Badjao.

Ginabug-usan ang task force sang DSWD, Commission on Human Rights, National Commission for Indigenous People, PNP, Provincial Social Welfare and Development Office, City Social Welfare and Development Office, Philippine Coast Guard, Department of Health, kag Department of Labor and Employment.

Una na nga gin-report nga nakalab-ut sa Iloilo City ang mga Badjao sang ginpadala sang Bacolod City LGU paagi sa ila “Operation Badjao.”

Nagmandu naman si Mayor Jerry Treñas sa PSTMO nga tipunon ang mga Badjao kag pabalikon sa Bacolod City agud man nga makapuli sa ila ginhalinan.

Naghatag ang DSWD 6 sang P240,000 nga cash assistance sa mga Badjao.