4 lakip ang mag-utod dakup sa drug buy bust operation sa Oton; Menor-de-edad nga babaye nga ginpahayag ginpilit sa paggamit sang illegal drugs na-rescue
ILOILO – Dakup sa drug buy bust operation ang apat ka individual sa Poblacion South, Oton las-6 kaina sang aga.
Ginkilala ang subject sa operation kay Darry Lamson sang La Paz.
Nadakpan man ang mag-ulutod nga kanday Kate, John Paul, kag Bonnie Nacita nga mga residente sang Sooc, Arevalo pero temporaryo nga nagatenir sa apartment sa Poblacion South, Oton.
Magluwas sa ila, na-rescue man ang 16-anyos nga babaye nga nagabantay sa bata ni Kate.
Sa panaysayon sang menor, ginapilit siya ni Kate nga maggamit sang illegal nga druga.
Gin-contact pa sang Oton police ang pamilya sang menor sa City Proper.
Samtang suno naman kay Police Major Rommel Anicete, head sang Regional Police Drug Enforcement Unit (RPDEU), isa na ka bulan nila nga gin-monitor si Lamson.
Dugang niya, si Lamson ang nagdala sa ila sa Oton rason nga nadakpan man ang mag-ulutod nga gintudlo nga ginakuhaan sang subject sang illegal drugs supply.
Si Kate, suno kay Anicete, ang ginakuhaan sang illegal drugs. smtang sanday Bonnie kag John ang nagasugat sa guwa sang mga mabakal.
Na-recover ang 125 grams sang illegal drugs nga may market value nga P850,000.00.
