Nursing assistant sa Don Valerio Palmares, Sr. Memorial District Hospital gindayaw sa iya pagbulig sa manugbata nga iya nalabayan sa kilid sang karsada sa Passi City
ILOILO – Madamo sang nagdayaw kay Mindalina Bolivar, nursing attendant sa Don Valerio Palmares Sr. Memorial District Hospital sa Passi City, kag sa iya bata nga si Jay-R Bolivar, nagatrabaho man sa pareho nga osiptal sa ila pagbulig sa manugbata nga babaye sa Sitio Apga, Brgy. Jaguimitan, Passi City las-6:35 kaina sang aga.
Suno kay Jay-R, pakadto na sila sang iya iloy sa duty sang nasundan ang tricycle nga ginasakyan sang nagabusong nga babaye. Natingala sila sang nakita nga nagdulog ang tricycle gani ginpapondo man nanday Jay-R ang ila salakyan agud ma-check kun may problema.
Natukiban nanday Jay-R nga manugbata na ang nagabusong gani nga ila ginbuligan sang iya iloy.
Na-manage ni Mindalina nga ma-stabilize ang sitwasyon sang nagabusong kag normal nga napa-deliver ang lapsag. Gilayon man nga gindala sa ospital ang babaye kag iya lapsag.
Sa subong, estable na ang condition sang mag-iloy.
23 ka tuig na nga nagaserbisyo sa Don Valerio Palmares Sr. Memorial District Hospital si Mindalina.
