Labing una nga SUC Fair sa guwa sang Metro Manila iga-host sang WVSU

ILOILO CITY – First time nga hiwaton sa guwa sang Metro Manila ang State Universities and Colleges (SUC) Fair sang Commission on Higher Education (CHED).

Ini tungod napilian ang West Visayas State University (WVSU) bilang lead host sang SUC Fair subong nga tuig nga pasakupan sang tanan nga State Universities and Colleges sa bug-os nga pungsod.

“We have prepared for almost more than a month including all the logistics and necessary requirements for us to conduct this four-day affair. I think we’re ready, West Visayas State University is ready and I think CHED is also happy with the way we prepare the program,” suno kay WVSU President Dr. Joselito Villaruz.

Hiwaton ang tanan nga aktibidad sa SM City Iloilo sugod buwas, Hulyo 10 tubtob 13 nga bukas sa publiko.

Ipresentar sa SUC Fair ang mga natun-an sa research nga gin-conduct sang mga State Universities and Colleges kag mga extension programs agud makabulig sa pagbag-o sa mga komunidad. Ipasundayag man suno kay Dr. Villaruz, ang mga technologies nga na-develop paagi sa mga research sang mga SUCs.

Lakip sa mga balantayan ang festivals of songs and dances nga masaksihan kada hapon, trade fair, kag Search for Mr. and Ms. SUC Fair 2023 nga highlight sang kahiwatan.

“Kanami ini siya kay it will showcase research as well as innovation and creativity of State Universities and Colleges,” dugang pa ni Dr. Villaruz.

Ginpasiguro man sang pamunuan sang WVSU nga mangin pinasahi ang SUC Fair subong nga tuig tungod ipakita diri ang pagkamaamumahon sang mga Ilonggos kag mga kultura sa Iloilo.

Gin-imbitar ni Dr. Villaruz ang publiko nga saksihan kag pasakupan ang mga aktibidad tungod luwas nga ma-edukar, magadala man ini sang kalingawan.