Maximum limit sang pwede mautang sa kooperatiba sa Iloilo City Hall dapat ipatuman — Mayor Jerry Treñas
ILOILO CITY – Dapat nga limitahan ang kantidad nga puwede mautang sang mga miembro sa Iloilo City Government Multi-Purpose Cooperative.
Ini ang ginpahayag ni Iloilo City Mayor Jerry Treñas sang natribukaho ang daku nga utang sang mga officers sang kooperatiba sang nagreklamo ang pila ka mga miyembro nga indi sila makautang.
“Isa sa mga problema siguro waay sang control kay ang cooperative is very loose. I think it should be incorporated in the articles of the cooperative kun pila lang ang puwede mahulam kag ano ang maximum limit,” suno kay Treñas.
Ginpasiguro sang alkalde nga pangitaan niya sang paagi agud masolbar ang problema kag maproteksyunan ang interest sang pag-deposit sang mga miyembro sang ila kuwarta sa kooperatiba.
Sa listahan nga nakuha sang Aksyon Radyo Iloilo, masobra P23 million ang nautang sang mga officers sa pondo sang kooperatiba.
“This is not what a cooperative should be. A cooperative should be there to be able to provide a leeway for people, especially when they have problems. Ang natabo pila lang ka bilog nga opisyales mismo ang nakahulam sang daku nga pondo sang kooperatiba, amo na ang indi manami. Pangitaan gid ni sang solusyon,” dugang sang alkalde.
Ginsapol sang alkalde ang mga miyembro sang kooperatiba upod sa City Legal Office agud ma-istoryahan ang nasambit nga problema.
