USAR chief, 1 rescuer ginkasuhan sa natabo nga disgrasya sa Baldoza, La Paz

ILOILO CITY — Duha ang ginpasakaan sang kaso nga reckless imprudence resulting to homicide may kaangtanan sa kamatayon ni Jay Ann Caburog, ang 14-anyos nga dalagita nga nadalasa sang water tanker truck sa Baldoza, La Paz sang Hunyo 11.

Suno kay Police Master Sergeant Ricky Ardamoy, imbestigador sang Traffic Enforcement Unit sang Iloilo City Police Office, lakip sa ginkasuhan kanday Urban Search and Rescue (USAR) chief Daryl Darwin Thulasidas nga nagmaneho sang tanker truck pagkatapos nga nakabunggo sa nagapundo nga tricycle, botika, kag lechon stand. Nagresulta ini sa pagkadalasa sang 19 ka indibidwal sa diin duha ang napatay lakip si Caburog.

Ginkasuhan man, suno kay Ardamoy, si Ildefonso Herrera ang nagmaneho sang rescue truck nga nagguyod sa water tanker nga ginmaneho ni Thulasidas.

Las-2 subong nga hapon ginpasaka sang pamilya ang kaso batok sa duha.

Una na nga ginpabutyag sang pamilya Caburog nga luyag nila mahatagan sang hustiya ang kamatayon sang ila himata.

Si Caburog ang ginlubong sang weekend.