Waiter patay sang gintiro sa North Fundidor, Molo; Awto nga naka-park sa kilid sang karsada nasalabat
ILOILO CITY – Patay ang lalaki nga nagasakay sa motorsiklo sang gintiro sa Avanceña Street, North Fundidor, Molo kaina sang kaagahon.
Ginkumpirmar ni Police Captain Benjie Dicen, hepe sang Molo Police Station, ang natabu nga shooting.
Suno sa mga barangay officials sa North Fundidor, mga las-tres kaina sang kaagahon natabu ang pagtiro sa biktima nga gin-identify kay Alejandro Panes, Jr. sang Zone 3, Dulonan, Arevalo pero subong nga aga lang natribukaho ang balita.
Waiter sa MO2 ang biktima kag papuli na sakay sa iya motorsiklo sang natabu ang pagtiro sa iya.
Base sa impormasyon halin sa mga barangay officials, may duha ka pilas ang biktima.
Una na ginpabutyag sang mga barangay officials nga nakapauli pa ang biktima antes siya gindala sa ospital.
Pero suno sa amay sang biktima nga si Alejandro, sa Caltex Gasoline Station sa Molo nagdiretso ang iya bata agud magpangayo sang bulig, kag didto na siya nag-uy-oy kag gindala sa ospital.
