Rex Amoroso nga gintudlo nagpatay kay Alejandro Panes, Jr. sa Molo nagtuad nga may preso sa Bilibid nga nag-contact sa iya kag naghambal nga ipapatay ang biktima
Ginbuyagyag ni Ricardo “ Rex” Amoroso nga may inmate sa Bilibid sa Muntinlupa nga luyag ipapatay si Alejandro Panes, Jr., ang waiter nga gintiro sa Molo samtang nagapauli halin sa duty sang Hunyo 11.
Si Amoroso ang ginatudlo sang mga testigo nga nakuha sang police nga gunman sa pagpatay sa biktima.
Suno kay Amoroso, kilala niya ang amo nga inmate nga iya gin-identify kay Rene Boy tungod nakaupod niya sadto sang napreso pa siya sa Bilibid.
Gin-alegar ni Amoroso nga nagtawag sa iya si Rene Boy kag naghambal nga may gin-contact siya nga duha ka lalaki nga mapatay kay Panes.
Lunes sang gab-i, Hulyo 10, sang nagkadto suno kay Amoroso ang duha ka lalaki sa iya kag nag-istorya kay Rene Boy sa telepono. Pagkatapos istoryahanay, gilayon man naglakat ang mga lalaki. Wala napa-athag ni Amoroso kun ngaa nagkadto pa sa iya ang duha ka lalaki bisan may contact man sa ila si Rene Boy.
Ginpabutyag ni Amoroso nga ginpapatay ni Rene Boy si Panes tungod ginatudlo niya ang biktima nga amo ang nagapanugid sa police rason nga nadakpan sa drug buy bust operation sa Oton ang iya mga tinawo.
Ginpanindugan ni Amoroso nga indi siya ang nagpatay kay Panes, kundi nagkadto lang sa iya balay ang mga tinawo ni Rene Boy nga iya gintudlo nga amo ang naghimo sang krimen.
