Punong Barangay sang Inagdangan Centro, Zarraga dakup sa drug buy bust operation sa sulod sang barangay hall
ILOILO — Dakup si Punong Barangay Bernard Galache, 55 anyos, sang Brgy. Inagdangan Centro, Zarraga sa drug buy bust operation sa sulod sang barangay hall subong nga aga.
Suno kay Police Lieutenant Marion Asparo sang Zarraga MPS, nabaklan ang kapitan sang isa ka sachet sang suspected shabu sa balor nga P22,000.
Gin-operate suno kay Lieutenant Asparo si Galache sang nakabaton sila sang impormasyon halin sa mga pumuluyo sang barangay nga naga-engage ang kapitan sa pagbaligya sang illegal drugs kag ginagamit pa ang barangay hall nga baligyaan.
“Nag-conduct kami sang intel[ligence] gathering para masiguro ang impormasyon tungod ang alegasyon tama ka bug-at [kag] especially gapadulong ang election,” suno kay PLT Asparo.
Halos tatlo man ka semana nga gin-monitor ang kapitan kag ne-verify ang impormasyon, suno sa pulis, gani nga gin-operate kaina sang aga.
“INDI TUOD”
Nanginwala naman si Galache sa akusasyon.
Suno sa iya, nagakatulog siya sa barangay hall sang nag-abot ang mga pulis, gindala siya sa pihak nga kuwarto, ginpahapa kag ginposasan. Wala suno sa iya sang natabu nga buy bust.
Dugang ni Galache, imposible nga mabaklan siya sang illegal drugs tungod pasado la-una kaina sang kaagahon na siya nagpauli halin sa namatyan sa Sta. Barbara.
