24-anyos nga babaye patay sang ginbuno sang iya karelasyon sa Estancia

ILOILO — Ginbuno-patay sang iya ka-relasyon ang 24-anyos nga babaye sa Brgy. Tacbuyan, Estancia, sang Hulyo 16 sang gab-i.

Ginkilala ang biktima kay Dina Malata, 24-anyos residente man sang nasambit nga barangay.

Suspect sa krimen si Ruel Sayson, 45-anyos sang Brgy. Poblacion Zone 3.

Suno sa utod sang biktima, nagakatulog na si Malata sa ila balay sang ginpukaw pa sang suspect. Nagbaisay sila sa guwa sang balay tubtob nga nabun-an ni Sayson si Malata.

Nahibaluan nga may duha ka kabataan sa iya una nga nakarelasyon ang biktima. Siya na lang ang nagabuhi sa iya duha ka kabataan tungod patay na ang iya nga bana.

Posible suno sa utod sang biktima nga nabal-an sang suspect nga makadto sa Manila si Malata agud magtrabaho kag wala niya ini na-uyunan. Ini ang ginalantaw nila nga rason kun ngaa nag-away ang duha nga nagresulta sa krimen.

Nag-surrender sa barangay si Sayson kag gin-turnover siya sa Estancia Municipal Police Station.

Gin-ako niya man ang krimen kag ginpahayag nga naimpito lang siya rason nga wala na nakapanumdom sang maayo. Wala niya ginbuyagyag kun ano ang rason sang ila gin-awayan pero nakainom siya suno sa iya sang nahimo niya ang krimen.

Gin-athag man sang suspect nga wala sila naga-live in sang biktima kag nagakitaay lang. Dugang niya, anum pa lang ka bulan ang ila relasyon.

Ginahulat pa sang pamilya ang medical record sang biktima agud mahibaluan kun diin ang iya pilas.