Trisikad driver patay sang gintiro sa La Paz

ILOILO CITY—Dead-on-arrival sa ospital ang 37-anyos nga trisikad driver sang gintiro sang suspect nga nagasakay sa motorsiklo sa Brgy. San Nicolas, La Paz mga pasado las-2 kaina sang kaagahon.

Ginkilala ang biktima kay Arturo Pabilona alyas Tata, 37-anyos, residente sang amo man nga barangay kag may igo sang pagkatiro sa likod, lusot sa dughan kag tiyan suno sa iya utod.

Suno kay Kagawad Rolen Balajadia, yara sa Barangay Anti-Drug Abuse Council (BADAC) list ang biktima kag nakaagi nga ginreklamo sa kaso nga pagpangawat, alarm and scandal kag away sa pamilya.

Sa initial nga pagpangusisa sang kagawad, nagalakat ang biktima sang ginlabayan sang naga-isahanon nga suspect nga nagasakay sa motorsiklo, ginpanaugan kag gintiro.

Una nga nabatian sang mga residente ang isa ka lupok sang pusil, kag duha pa gid ka sunod-sunod nga lupok pagkatapos ang pila ka sigundos, suno sa kagawad.

Ginpahayag sang kagawad nga posible nagdalagan pa ang biktima pero naabutan sang suspect.

Sa pagkabalo ni Balajadia, mahilig maglagaw kun gab-i ang biktima gani bugtaw pa siya kag nagalakat kaina.

Na-recover sa crime scene ang duha ka empty shell kag duha ka live ammunition, suno kay Kagawad Balajadia.

Wala pa sang identity ang police sa suspect.