Reading comprehension sang Grade 3 students sa Iloilo province yara lang sa 27.80% — Synergia
ILOILO— Yara lang sa 27.80% ka mga Grade 3 students sa Iloilo Province ang “grade ready” ukon nakahibalo magbasa kag mag-intiendi.
Ini ang ginpresentar nga data sang Synergeia Foundation halin sa Department of Education (DepEd) sa gin-conduct nga Education Summit sang Provincial Government kaina sang aga.
Suno kay Governor Arthur Defensor, Jr., malnutrition ang posible isa sa mga nagaapekto sa pagtuon sang mga kabataan ilabe na gid sa mga mabudlay kadtuan nga lugar sa probinsya.
Ginpahayag pa sang gobernador nga kakulang sang classroom ang isa sa mga nagadugang nga problema nga nagresulta sa pigado nga pagtudlo sa mga kabataan. Nalakip man ang kakulang sang manunudlo sa mga factors sa manubo nga reading comprehension.
Isa man sa mga pamaagi nga nakit-an ni Defensor agud mahagan-hagan ang problema, amo ang pagbuliganay sang tagsa ka pamilya, local government units kag private sector.
“We are committed to engaging the community to the fullest so we can fill the gaps, together with our barangay and family,” suno pa kay Defensor.
Ginpasalig man sang gobernador nga handa maghatag sang financial support ang provincial government pinaagi sa Special Education Fund ilabe na gid ang kakulang sa imprastruktura nga kinahanglan sang Department of Education.
Tinutuyo sang Education Summit nga ma-address ang gap agud nga mapataas ang reading comprehension sang mga learners sa probinsiya.
Lakip sa mga participants sang aktibad ang 43 ka mga alkalde sa probinsya, education chairman sa mga Sangguniang Bayan, School District Supervisor – Schools Division of Iloilo kag opisyal sang DepEd.
