Customer sang bouncer sang ilimnan sa San Rafael, Mandurriao nagtapungulay

ILOILO CITY — Nagtapungolay ang bouncer kag customer nga lalaki sa ilimnan sa San Rafael, Mandurriao pasado las-4 kahapon sang kaagahon, Hulyo 23.

Suno kay Police Staff Sergeant Antonio Santianez, imbestigador sang Mandurriao Police Station, ginpabutyag sang bouncer nga una nga nagguwa sa ilimnan ang grupo sang customer kag ginlagas niya kag ginmunuhan nga may P400 pa sila nga balayran.

Gindugang sang bouncer nga ginpwersa pa sang customer nga buksan ang puwertahan, rason nga ginpunggan niya pero ginsumbag siya sa liug kag nag-umpisa ang komosyon, suno sa police.

Nagdepensa naman ang customer, suno sa police, nga maguwa lang sila sang iya grupo kag mabalik man kuntani tungod wala pa sila nakatapos inom, apang hinali lang siya gintapungol sang bouncer.

Naka-istoryahanay na kaina sang aga ang duha nga involved sa insidente, suno sa police.

“Misunderstanding” ang ginhalinan sang ginamo, suno kay Santianez.

Nagpangabay man ang management sang ilimnan sa customer nga ipakay-o ang naguba nga pwertahan.

Wala pa sang desisyon ang mga involved kun mapasaka sang kaso ukon ma-aregluhanay na lang.