Anay 4Ps beneficiary nakakuha sang silver medal sa International Silat Championship sa Malaysia
Nakakuha sang silver medal sa gin-intrahan niya nga seni artistic ganda female category sa Sarawak Premier International Silat Championship sa Malaysia ang anay Pantawid Pamilya Pilipino Program (4Ps) beneficiary nga si Jeremae Beato sang Brgy. Inapoy, Kabankalan City, Negros Occidental.
Graduate sang Iloilo Science and Technology University (ISAT-U) sa kurso nga Bachelor of Science in Computer Science si Beato.
2015 sang naka-avail siya sang scholarship sa paagi sa Extended Student Grant-in-Aid Program for Poverty Alleviation (ESGP-PA) kag nangin student athlete man sang unibersidad.
Madamo siya sang nadag-an sa ginpang-intrahan niya nga mga regional kag national competitions sa State Colleges and Universities Athletics Association (SCUAA) sang naga-eskwela siya sa kolehiyo.
Pagka-graduate sa college, nangin miembro siya sang national team kag nakatipon sang sari-sari nga mga medalya sa lain-lain nga mga kompetisyon nga iya ginpasakupan sa mga pungsod sa Southeast Asia.
Ginapasalamatan ni Beato nga nangin miyembro sang 4Ps ang iya pamilya tungod ini suno sa iya ang nangin palaagyan niya para sa mas madamo nga mga oportunidad. – via DSWD 6
