Awto na-damage sang nahulugan sang 3D panel sa parking area sang Gaisano City La Paz

ILOILO CITY – Gupi ang atop kag guba ang windshield sang awto nga Honda civic sang nahulugan sang nagkalataktak nga dingding sa porsyon sang parking area sang Gaisano City La Paz pasado las-3 kahapon sang hapon, July 25.

Suno kay Lucy nga tag-iya sang salakyan, ginpa-blotter na nila sa La Paz Police Station ang natabo kag ginsabat naman sang management sang Gaisano City ang pagpakay-o sang salakyan.

Base sa impormasyon nga nakuha sang Aksyon Radyo Iloilo news team, may isa pa gid ka SUV nga nahulogan man sang dingding sa parking area sang mall.

Ginkordon na ang parking area agud malikawan nga masundan ang insidente.