Lalaki patay sang nahulog sa depasahero nga jeep sa Igbaras
ILOILO — Patay ang 20-anyos nga lalaki sang nahulog sa ginasakyan nga depasahero nga jeep sa Brgy. Jovellar, Igbaras kahapon.
Ginkilala ang biktima kay Alwyn Eterno sang Poblacion East, Oton.
Suno kay Police Lieutenant Martin Pugales, Officer-in-charge sang Igbaras Municipal Police Station, nagakabit sa likod sang jeep ang biktima. Posible suno sa isa pa ka pasahero nga naghabyog ang lawas sang lalaki sang nagliko sa kurbada sa Crossing Pasong, Barangay Jovellar ang jeep gani nga nahulog siya nga nagresulta sang pilas sa ulo.
Nagaguwa sa imbestigasyon nga may cellphone nga gina-uyatan ang biktima samtang ang isa niya ka kamot ang naga-uyat sa stainless nga parte sang jeep, base man sa panaysayon sang isa pa ka pasahero.
Halin sa Iloilo City ang jeep.
Makadto kuntani ang biktima kag duha niya ka upod sa pamilya nila sa Brgy. Taytay, suno pa kay Pugales.
Gindala pa sa ospital ang biktima apang napatay kagab-i.
Yara sa kustodiya sang Igbaras police ang driver sang jeep.