Pagserbe sang makahulubog nga ilimnon sa mga bars kag kapareho nga establisemento balik tubtob las-4 sa kaagahon

ILOILO CITY —Ginkumpirmar ni Task Force for Morals and Values Formation Head Nestor Canong nga balik sa las-4 sa kaagahon ang pagserbe sang makahulubog nga ilimnon sa mga bars kag kapareho nga establisemento sa siyudad.

Suno kay Canong, gina-draft na ni Mayor Jerry Treñas ang executive order nga magabawi sang iya una nga EO nga ginpaguwa sang Hulyo 27, 2023 nga tubtob lang las-12 sang tungang gab-i ang pagserbe sang ilimnon tungod sa natabu nga mga kinagamo.

Nadesisyunan suno kay Canong ang development makaligad nga nagsapol ang alkalde sa mga bar owners.

Nagpasalig suno sa iya ang mga bar owners nga sundon ang mga guidelines sang siyudad pareho sang pag-train sa ila mga bouncers kag security personnel kag pagbutang sang CCTV cameras agud mapabilin nga malinong kag matawhay ang ila mga establisemento.