Lalaki gintiro sang security guard sa Zarraga; Suspect nadakpan sa Santa Barbara

ILOILO — Pilason ang 27-anyos nga lalaki sang gintiro sang security guard sa Poblacion Ilawod, Zarraga kagab-i, Agosto 5.

Ginkilala ang natiruhan kay Paquinto Beza samtang ang nagtiro amo si Mark Anthony Chichirita.

Suno kay Police Captain Raffy Señeres, hepe sang Zarraga Police Station, ginbantayan ni Beza si Chichirita samtang nagasakay sa motorsiklo kaupod ang isa ka babaye kag ginbuno sa likod.

Natumba ang motorsiklo kaupod ang babaye samtang nagpalagyo si Chichirita.

Pero, makita sa video nga ginbalikan ni Beza ang babaye kag nagbalik man si Chichirita kag gintiro siya sang tatlo ka beses.

Nagpalagyo naman si Chichirita sakay sa iya motorsiklo pero tungod nga may pilas nagpabulong siya sa Rural Health Unit sang Sta. Barbara sa diin siya nadakpan.

Gindala si Beza sa Iloilo Provincial Hospital sa Pototan samtang gin-refer sa Western Visayas Medical Center si Chichirita.

Nag-guwa sa inisyal nga imbestigasyon sang Zarraga police nga live-in partner ni Beza ang babaye.

Nagaduda si Beza sa iya live-in partner rason ginbantayan sa lugar sa diin sila naga-ubra kag nakita niya ang duha nga naga-angkasanay sa motorsiklo.

Nagapadayon pa ang imbestigasyon sa insidente.