4 ka mga lalaki lakip ang 2 ka menor-de-edad nagtapungulay sa San Rafael, Mandurriao
ILOILO CITY — Nagtapungulay ang apat ka kalalakihan lakip ang duha ka mga menor-de-edad sa San Rafael, Mandurriao kahapon sang kaagahon, Agosto 6.
Ginpahayag ni Police Captain Val Alan Cambel, Officer-In-Charge sang Mandurriao Police Station, nga base sa ila imbestigasyon, nagapauli ang duha ka mga lalaki sa Airport, Mandurriao kag naglabay sa San Rafael sang ginsita sila sang duha ka menor-de-edad.
Nagsinabtanay suno sa iya ang duha ka lalaki kag ang mga menor tubtob nga nagtapungulay.
Gin-ako sang duha nga naka-inom sila sang natabo ang kinagamo.
Gin-claim naman sang mga menor-de-edad nga ang duha ka lalaki ang una nga nagsita sa ila.
Gilayon naman nga nakaresponder ang police sang nakita nga may kinagamo sa lugar.
Wala sang may na-recover nga deadly weapon ang police kag wala man sang napilasan sa natabo.
Ginklaro naman ni Cambel nga indi sa guwa sang balay ilimnan natabo ang kinagamo kundi sa atubang sang isa ka shopping warehouse malapit sa isa ka ospital sa amo man nga barangay.
