Suspected shabu nakuha sa dalaw nga babaye sa BJMP Ungka
ILOILO CITY — Wala nakahibalo si Vivian Gustilo, 36, sang Brgy. Ticud, La Paz nga may unod nga suspected shabu ang ginpaulayhon sa iya nga plastic bag sang nagsulod sa Bureau of Jail Management and Penology (BJMP) sa Ungka, Jaro kahapon, August 9.
Suno kay Gustilo, nagpadulong siya sa penal facility agud magbisita sa iya live-in partner nga Person Deprived with Liberty (PDL). Na-preso ang iya partner tungod sa kaso may kaangtanan sa illegal nga druga.
May taga-Ticud, suno sa iya nga nagpaulayhon sa iya agud iduhol kay Alyas Dencho nga PDL man sa BJMP-Ungka. Gin-aku ni Gustilo nga indi niya kilala ang ngalan pero mahitsurahan niya ang lalaki nga nagpaulayhon sa iya.
Suno pa kay Gustilo, wala niya man na-check ang unod sang plastic bag.
“Wala [ko kabalo nga may unod nga drugs] kay hambal niya gani ‘iduhol lang bala.’ Wala [ko ginbukad] kay syempre may salig ko,” suno kay Gustilo.
Sa interview sang Aksyon Radyo Iloilo kay Jail Superintendent Jairus Dogelio, jail warden sang BJMP Ungka, ginpahayag niya nga nakit-an nga may plastic nga naglabaw sa uling nga dala ni Gustilo rason nga gin-usisa. Sang gin-usisa, may naipit nga suspected shabu sa uling.
Gindala na sa Jaro Police Station si Gustilo.
