Barangay kagawad sa Barotac Viejo kag iya utod dakup s drug buy bust operation sa Banate

ILOILO — Arestado ang Barangay kagawad sang Santiago, Barotac Viejo kag iya nga manghod sa drug buy bust operation sa Brgy. Merced, Banate kahapon sang hapon, Agosto 15.

Ginkilala ang mga nadakpan kanday Brgy. Kagawad Hermil Agsaluna, 40-anyos nga anay miyembro sang Philippine Marine Corps kag iya nga manghod nga si Ar-ar Agsaluna, 28-anyos nga vegetable vendor.

Suno kay Police Lieutenant Dandy Ilalto, hepe sang Banate Municipal Police Station, duha ka semana nga gin-monitor sang kapulisan si Ar-ar nga nagabaligya sang illegal drugs, kag ang engagement sang kagawad tubtob gin-operate kaina sang hapon.

Sa pagpangusisa sang police, konektado si Ar-ar kay Randy Lamera sang Brgy. Cabugao Norte, Sta. Barbara nga gindakup sang kapulisan sa buy bust operation sang Agosto 1 sa Brgy. Poblacion, Barotac Viejo kag nakuhaan sang masobra tunga sa milyon ka pesos nga balor sang suspected shabu.

Sa operasyon sang Banate police kaina sang hapon, nabaklan ang mag-utod sang isa ka sachet sang suspected shabu sa balor nga P1,500, suno sa police.

Na-recover pa gid ang dugang nga apat ka sachet sang suspected shabu nga ginabanta nagabug-at sang 6 grams kag nagabalor sang P40,000.

Preso na sa Banate Police Station ang mga nadakpan.