Masunod nga House committee hearing may kaangtanan sa Ungka, Aganan flyovers ginaduso nga dal-on sa Iloilo

MANILA – Ginaduso nga hiwaton sa Iloilo ang masunod nga hearing sang House Committee on Public Works and Highways may kaangtanan sa kontrobersiyal nga Ungka Flyover kag Aganan Flyover.

Ini ang ginsuhestiyun ni Kabataan Partylist Rep. Raoul Manuel nga nagduso sang resolution para imbestigaran ang nasambit nga mga proyekto.

Suno kay Manuel mas maayo nga dal-on sa Iloilo ang hearing tungod diri nahamtang ang mga proyekto. Dapat man suno sa iya nga magpadulong ang national officials sang Department of Public Works and Highways kag Bureau of Design sa Iloilo.

Ipatawag man sa masunod nga hearing ang tiglawas sang International Builders Corporation (IBC) nga contractor sang proyekto, kag third party consultant nga naghimo sang imbestigasyon sa Ungka Flyover.

Kahapon, gin-umpisahan sang komitiba ang hearing.