Presyo sang bugas amat-amat nga may pagmahal sa Iloilo Terminal Market

ILOILO CITY – Nag-amat-amat saka ang presyo sang bugas halin sang gin-anunsyar sang Department of Agriculture sa interview nga may shortage.

Ini ang obserbasyon ni Billy Lorca, Jr. nga nagabaligya sang bugas sa Iloilo Terminal Market. Tungod sini, gin-ako ni Lorca nga nagaduda siya nga ginatago ang supply sang bugas. “Sa nadumduman sang nagligad bulan nga gin-interview ang taga-DA (Department of Agriculture) nga may shortage sa bugas. Didto gid ni nag-umpisa nga daw sunud-sunod na dayon ang pagsaka sang presyo. Kasiling ko sa akon huna-huna nga gaduda ako nga ginatago siguro kay pag-announce lang nga may food shortage kita daw amo na nga halos kada duha, tatlo ka adlaw saka dayon ang presyo.”

Ginbuyagyag man ni Lorca nga wala niya ginapatam-an ang pagpasaka sang presyo kag may tiun nga ginasakripisyo niya ang ginansiya agud nga indi madula ang iya mga suki.

Suno kay Lorca, may P3- P5 nga saka sa presyo sang bugas, depende sa variety. –via Aksyon Hotline