20 anyos nga driver sang motorsiklo patay sa aksidente sa Leon, Iloilo

ILOILO — Dead-on-arrival sa ospital ang driver sang motorsiklo sang nabungguan sang isa pa gid ka motorsiklo sa F. Cabarles St. Leon, Iloilo sang Agosto 19 sang gab-i.

Ginkilala ang napatay kay Quiel John Calumno, 20-anyos, residente sang Brgy. Isian Victoria sang amo man nga banwa.

Suno kay Police Lieutenant Danilo Noca, Deputy Chief of Police sang Leon Municipal Police Station, hinali nga nag u-turn si Calumno rason nga nabungguan sang nagasunod nga motorsiklo nga ginamaneho naman ni Don Rex Cabansag.

Madasig ang pagpadalagan sang motorsiklo ni Cabansag rason nga nagtabog ang biktima kag nakabunggo ang ulo sa semento.

Samtang may pilas naman sa tuo nga paa, tuo nga tuhod, kag tuo nga mata si Cabansag.

Wala sang suksok nga helmet ang duha.

Ginapreparar na sang Leon police ang ang kaso nga reckless imprudence resulting to homicide kag damage to property batok kay Cabansag. —via Marvin Malificiar