Alimodian LGU mapatawag sang meeting agud istoryahan ang viral photo sang depasahero nga jeep nga overloaded sang pasahero
ALIMODIAN, ILOILO—Natalana nga mag-meeting subong nga semana ang Alimodian LGU kag Alimodian Jeepney Owners and Drivers Association (ALIJODA).
Ginpatawag ni Alimodian Mayor Ian Kenneth Alfeche ang meeting tungod sa nag-viral nga litrato sa social media sang depasahero nga jeep nga may biyahe Alimodian-Iloilo City vice versa nga puno sang mga pasahero. May nagakabit nga mga pasahero sa stand board, kag may mga nagapungko sa atop sang jeep.
Sa pagpangusisa sang Aksyon Radyo Iloilo news team, naandan na sang mga pasahero nga magkabit ukon magpungko sa atop tungod ginakulang ang nagabyahe nga jeep sang Alimodian ilabe na kun rush hour.
Suno sa mga pasahero, ginbuhinan sang ALIJODA ang ginapabyahe nga jeep tungod nagareklamo ang mga drivers nga wala man sa ila nagasakay ang pasahero pauli sa Alimodian.
Mas ginapili sang pila ka pasahero, suno sa ila, nga mga magsakay na lang sa Leon nga jeep kun magpauli.
Ginpahayag sang mga pasahero nga mas ginapili nila nga magsakay sa Leon nga jeep tungod nagalakat gilayon kun mapuno na.
Samtang ang naandan sa Alimodian nga jeep matiner pa sang isa ka oras sa terminal antes maglakat, bisan puno na sang pasahero.
Nakalab-ut ang viral post sa opisina nanday Mayor Alfeche kag Vice Mayor Kalay Alonsabe.
Suno kay Alfeche, bag-o lang siya nakakita sang Alimodian nga jeep nga tuman ka puno sang pasahero.
Bastante suno kay Alfeche ang numero sang nagabyahe nga jeep gani amo na lang ang iya pagkatingala sa sistema sang pagpasakay sang mga drivers sa mga pasahero.
Sa meeting, hibaluon ni Alfeche kun ano ang mga pagsulundan sang asosasyon sa sistema sang pagpasakay sang pasahero.
Mahatag naman sang intervention ang Alimodian LGU depende sa mangin resulta sang meeting agud masolusyunan kag indi na maliwat ang kapareho nga insidente.
