Residential rate sang MORE Power nagnubo

ILOILO CITY —Nagnubo sang P0.44/kWh ang residential electricity rate para sa billing cycle sa Agosto sa syudad sang Iloilo.

Ini suno kay Mr. Niel Parcon, Head sang Corporate Planning and Regulatory Affairs sang MORE Power.

Yara na sa P10.9840/kWh ang average residential electricity rate para sa billing cycle subong nga bulan, mas manubo sa P11.42 nga electricity rate sang Hulyo.

Paathag ni Parcon, ang pagnubo sa presyo sang electricity rate subong nga bulan tungod sa pagnubo sang bili sang fuel sa world market sa nakaligad na nga tatlo ka bulan, partikular ang supply sang kuryente halin sa power supplier nga KEPCO SPC nga naga-constitute sang kapin 19.06% share sa energy procurement, kag Sem Calaca Power nga ,may yara naman sang 30.90% share.

Halin sang nagligad nga tuig nga yara pa sa geothermal source ang generation sang kuryente sang MORE Power, naglab-ut na sa kapin P4 ang gin-reduce sa presyo sang electricity rate sa syudad subong nga ang generation halin na sa coal power plant kag non-renewable resources.

Naka-contribute pa diri, suno kay Parcon, ang mas manubo nga bili sang non-renewable resources rason nga mas nag-stabilize pa ang electricity rate.

Dugang pa niya, gina-project sang MORE Power ang posible nga pagnubo pa sa presyo sang electricity rate tubtob sa bulan sang Nobyembre tungod sa padayon nga pagnubo man sa presyo sang fuel source.

“Ikawalo na ini nga sige-sige [nga pagnubo sa presyo sang power rates sa syudad sang Iloilo] kay ang aton nga coal price sige-sige man ang reduction into the last nine months na actually. Bale ang sa(ng) isa ka bulan, sa next month ta pa mabatyagan naman [ang pagnubo sa presyo sang power rates],” suno kay Parcon.

Epektibo para sa August billing ukon halin Agosto 18 tubtob Setyembre 14 nga billing statement ang amo nga pagnubo sa presyo sang power rates.

Gina-target naman sang MORE Power nga mabalik sa single-digit peso ang presyo sang electricity rates sa syudad. —via Firingline