2 pilason sang nakabunggo ang awto sa poste sa Jaro

ILOILO CITY — Duha pilason sang nakabunggo ang awto sa poste sa kilid sang karsada sa Brgy. Buhang, Jaro kagab-i, Agosto 21.

Napilasan ang driver sang awto kag ang sakay niya nga lunsay residente sang Barangay Tabuc Suba, Jaro.

Suno kay Police Master Sergeant Jeffrey Janay, traffic investigator sang Jaro Police Station halin sa Leganes kag pakadto sa Iloilo City ang direksyon sang salakyan.

Dugang pa ni Janay nga napiyungan ang driver, base man sa iya panaysayon kag pag-abot sa atubang sang Ceres terminal nadulaan siya sang kontrol sa manibela tubtob nagdiretso sa poste sa kilid sang karsada.

Madasig ang dalagan sang salakyan base sa nakuha nga CCTV footage sang police.

Napilasan sa ulo kag iban pa nga parte sang ila lawas ang duha tungod nag-awas sila sa windshield sang salakyan.

Confined sa Western Visayas Medical Center ang duha kag estable naman ang kondisyon, suno kay Janay.