Lalaki nga nagatabok sa pedestrian lane sa Diversion Road, Mandurriao nabungguan sang awto
ILOILO CITY — Na-capture sang CCTV camera sang Aksyon Radyo Iloilo ang vehicular accident sa Diversion Road, Mandurriao las 11:20 sang aga.
Base sa kuha sang CCTV camera, nagatabok sa pedestrian lane ang lalaki sang nabungguan sang awto.
Makita as footage ang pagbunggo sang biktima sa windshield sang salakyan kag nagtupa sa karsada.
Gilayon nga nag-abot ang ICER sa lugar kag gindala ang lalaki sa ospital.
Sa pagpangusisa sang Aksyon Radyo news team, ginkilala ang biktima kay Raily Kurt Baldoza, 18-anyos sang Cabolo-an Sur, Oton.
Ginkilala naman ang driver sang awto kay Christian Rey Marco sang Monterosa Subdivision sa Mandurriao.
Suno sa driver, ginabanta sa 60 km per hour ang iya pagpadalagan sang salakyan.
Nag-amat amat pa siya hinay sang nakita nga manugtabok ang lalaki. Nagpati ang driver nga mapondo pa ang biktima tungod madamo sang salakyan apang nakibot na lang siya sang gulpi lang nagtabok.
Napilasan sa ulo kag butkon ang biktima.
Sa pagpangusisa, matabok ang biktima agud magkadto sa iya mga upod sa skate park para mag-practice sang saot.
Natabuan naman nga may naglabay nga medic personnel sa lugar kag ginhatagan sang first aide ang biktima agud ma-control ang pagdugo sang iya ulo samtang ginahulat ang ambulansya sang ICER.
Nagpasalig naman ang driver sang awto nga siya ang magasto sa pagpabulong sa biktima. Nagpangayo man siya sang sorry sa pamilya sang biktima.
Sa subong, estable na ang kondisyon sang biktima sa ospital.
