Asawa sa Guimaras patay sang ginbuno sang bana

GUIMARAS —Patay ang asawa sang ginbuno sang iya bana sa isa ka Barangay sa Buenavista, Guimaras sang Agosto 23.

Suno kay Police Major Jeffrey Ferrer, hepe sang Buenavista, Guimaras Police Station, nagaguwa sa ila imbestigasyon nga nagbaisay ang mag-asawa tubtob nga ginbuno sang bana ang asawa.

Gindala sa ospital ang asawa kag nakapanugid sa police nga ginbuno siya sang iya nga bana.

Suno kay Major Ferrer, may pilas ang biktima sa idalum sang tuo nga parte sang dughan.

Pagpangimon ang ginalantaw sang police nga anggulo sa krimen.

Ginsaysay ni Major Ferrer nga nakaagi nga ginreklamo sang 39 anyos asawa ang iya 39 anyos nga bana tungod may iban nga babaye. Nag-aregluhanay suno sa police ang mag-asawa.

Pero kahapon, liwat sila nga nagbaisay tubtob natabu ang pagpangbuno.

Gintinguhaan sang Aksyon Radyo Iloilo News team nga makuhaan sang pahayag ang bana, pero nagpamalibad nga magpa-interview.

Ang mag-asawa may duha ka kabataan nga pareho pa nga menor-de-edad. —via Francisco Enar