Masobra P1 million nga balor sang suspected shabu na-recover sa drug buy bust operation sa Lemery, Iloilo

ILOILO— Na-recover ang P1.3 million nga balor sang suspected shabu sa apat ka mga nadakpan sa drug buy bust operation sa Brgy. Poblacion Southeast, Lemery las-12:24 kaina sang kaagahon.

Dakup sa operasyon ang mag-ulutod nga Shiela Mae, Bryan, kag Jose Maria Yu. Arestado man si Angel Kyth Alavaren. Lunsay residente sang Brgy. Poblacion, Estancia ang apat.

Suno kay Police Major Francis Albert Fortunado, head sang Provincial Intelligence Unit sang Iloilo Police Provincial Office (IPPO), isa ka tuig na nga yara sa regional target list sang police si Shiela Mae kag provincial target list naman si Jose Maria.

Na-recover ang 31 ka sachets sang suspected shabu, P21,000 nga buy bust money, kag mga non-drug items.

Ginpabutyag ni Fortunado nga nagasaylo-saylo sa Roxas City kag Iloilo City ang mga nadakpan kag natyempuhan nga nagtipon sila nga apat sa apartment sa Lemery.

Ang mga nadakpan ang ginapatihan naga-distribute sang illegal drugs sa pila ka mga banwa sa probinsya, suno sa police.

Dugang sang police, madamo sang koneksyon ang mga nadakpan kag ginakuha ang stocks sa Iloilo City kag Roxas City.