4 pilason sa paglab-anay sa Calinog

ILOILO—Apat ang pilason sang naglab-anay ang 53-anyos nga lalaki kag ang tatlo ka mag-ulutod sa Barangay Toyungan, Calinog las-10:30 kahapon sang aga, Setyembre 3.

Suno kay Police Major Myles Dieron, hepe sang Calinog Municipal Police Station, nag-inom kagab-i ang mag-utod nga Rex, Regie kag Benedicto Lastimoso sang ginhangkat sang inaway ang biktima nga si Noe Latumbo nga yara sa sulod sang iya nga balay pero wala ginsapak sang uligi.

Sang nakita ni Latumbo si Benedicto kaina sang aga, ginpamangkot niya kun ano ang rason sa pagpanghangkat nila sang away pero wala siya nagsabat kag naglakat lang, suno sa police.

Ginpabutyag sang police nga pagbalik ni Benedicto, upod na niya ang iya duha ka utod nga may dala na nga binangon kag ginlabo si Latumbo. Tungod may dala man nga binangon ang biktima, nagbalos man siya suno sa police.

Nakaagum sang pilas sa ulo kag nagkalain-lain nga parte sang lawas si Latumbo, samtang napilasan man sa nagkalain-lain nga parte sang lawas ang tatlo ka mag-ulutod.

Gindala sa ospital si Latumbo samtang naka-hospital arrest ang mag-utod nga Regie kag Benedicto. Presu naman sa Calinog Police Station si Rex.

Ginahulat pa sang police ang desisyon sang biktima kun mapasaka sang kaso batok sa mga suspect.