Mga retailers sa merkado sa siyudad sang Iloilo nagpabutyag nga mapierde sila kun ipatuman ang price ceiling sa bugas
ILOILO CITY – Nanindugan ang pila ka mga retailers sang bugas sa Iloilo Central Market nga indi sila magsunod sa price ceiling sa presyo sang bugas.
Base sa Executive Order No. 39 ni President Ferdinand Marcos, Jr., P41 kada kilo ang price ceiling para sa regular milled rice kag P45 kada kilo sa well-milled rice nga maga-epekto sugod subong, Setyembre 5.
Suno kay Alyas Apple, P2,280 ang bakal nila kada saku sang bugas sa regular milled rice kag kun ibaligya nila sang P41 kada kilo, mapierde sila sang P5. Samtang P2,300 kada saku sang well-milled nga bugas ang ila bakal kag kun ibaligya naman nila sang 45 kada kilo, mapierde man sila sang malapit sa P2.
“Kun pila ang presyo [kada saku sang bugas], i-divide namon kag amo na ang presyo sa retail. Kun P45 pierde gid kami katama. Manira na lang kami. Indi kami ‘ya magpanubo, pierdehan namon?” suno kay Apple.
Nagalibog ang ulo ni Apple kun diin kuhaon ang igasto sa trucking sa mga bugas kag renta sa merkado kun sundon nila ang price ceiling nga ginamandu sang gobyerno.
Ginsuhestiyun man sang mga rice retailers nga kuntani sa mga suppliers ipatuman ang price ceiling agud mapabarato man nila ang baligya-anay sang bugas sa merkado.
“Halin dapat sa wholesaler/ supplier dapat ang magpanubo kay nagasunod lang kami, kun pila ang presyo didto, i-divide man ina namon,” dugang pa ni Apple.
Una na nga nagpaandam ang gobyerno nga may salabton kag multa ang sin-o man maglapas sa probisyon sang Price Act para sa mandated price ceiling.
