Mga residente sa Zone 3 Cochero, Molo wala na gid sang maagyan tungod sa ginbutang nga atop sa pader nga ginpatindog sa right of way

ILOILO CITY – Nagdugang ang kabudlay sang mga residente sa Zone 3, Cochero, Molo tungod gin-atupan ang semento nga pader nga ginpatindog sa right of way.

Sugod nga ginpatindugan sang pader, nagbutang sang hagdan ang mga residente agud nga makataklas kag makasulod sila sa ila lugar.

Pero suno sa residente nga si Alyas Boboy, mabudlayan na sila tungod ginkuha na ang hagdan kag wala na sila sang madali nga malutsan. Ginakahangaw-an nila nga mabutang sila sa alang-alang pananglitan nga may magluntad nga emerhensiya.

May alternatibo pa man nga gina-agyan ang mga residente pero kinahanglan nila nga magsulod sa kuwarto sang isa ka balay kag mag-agi sa tiyangge kag computer shop.

Makaluluoy suno sa iya ang mga naga-trabaho nga aga pa nga nagahalin sa ila balay kag gab-i na kun makapauli tungod wala gid sang may maagyan tungod nagapanirado na ang tag-iya sang balay nga puwede nila maagyan.

Nagapakitluoy naman ang pila ka mga residente sa tag-iya sang duta nga kuntani “kuhaon” lang anay ang pader samtang wala pa sila ma-relocate.