Pulis

Backrider sang motorsiklo nga nagtuyo malagyo sa police checkpoint sa Jaro nakuhaan sang suspected shabu

ILOILO—Nakuhaan sang suspected shabu ang backrider sang motorsiklo nga nagtuyo malagyo sa police checkpoint sa Tabuc Suba, Jaro kagab-i, Setyembre 16.

Suno kay Police Major Eduardo Siacon, Jr., hepe sang Jaro Police Station, halin sa Leganes kag papuli na kun tani sa Barangay Airport, Mandurriao ang duha ka sakay sang motorsiklo.

Sang naglabay sa police checkpoint sa Brgy. Tabuc Suba, wala nagdulog ang motorsiklo suno kay Siacon gani ginlagas sang mga police pero nadakpan.

Sang nagpanaug sa motorsiklo ang duha ka sakay, nahulog halin sa kamot sang backrider ang isa ka sachet sang suspected shabu tungod “nagasala” siya, suno sa police.

Ginpabutyag naman sang driver sang motorsiklo nga wala sila sang plano nga magpalagyo sa checkpoint.

Suno sa iya, “Naka-helmet ko, wala ko mayo kabati… Natingala lang ko nga nagsala siya gani (backrider).”

Nanindugan man ang driver nga wala siya nakahibalo nga may illegal drugs ang iya nga upod.

Detained ang driver kag ang backrider sa Jaro Police Station.

aksyonradyoiloilo

Aksyon Radyo Iloilo is the No. 1 station in both AM and FM bands in Iloilo based on April and September 2023 and June 2024 Kantar Media surveys.

Leave a Reply