Pagbutang sang traffic cones sa inner lane pasaka sa Ungka Flyover ginakonsiderar sang Pavia Traffic Management Office

Read Time:58 Second

Ginakonsiderar sang Pavia Traffic Management Office nga magbutang sang traffic cones sa inner lane pasaka sa Ungka flyover.

Ini agud nga indi magsimpon ang mga light vehicles sa outer lane nga may tuyo nga magdiretso sa service road. sa idalom.

Suno kay Pavia SB Member Jose Maria Trimañez, chairman sang Committee on Transportation sa Sangguniang Bayan, ma-deploy sila sang traffic aides sa approach sang flyover agud magdeterminar sang mga salakyan nga makalabay sa ibabaw sang flyover.

Daku naman ang pasalamat sang konsehal nga ginkonsiderar sang Department of Public Works and Highways (DPWH) 6 nga temporaryo buksan ang flyover para sa mga light vehicles agud mahagan-hagan ang pagpugok sang trapiko sa idalom kun rush hours.

Una na nga nagpaguwa sang statement si DPWH OIC, Engr. Sanny Boy Oropel nga base sa rekomendasyon sang third party consultant, chief of operations, director sang DPWH Bureau of Design, kag DPWH Secretary Manuel Bonoan, pwede buksan ang flyover sa mga light vehicles kasubong sang private cars nga makalusot sa vertical clearance nga ginbutang sang ahensya.

Dumilian naman ang paglabay sang mga motorsiklo, bisikleta kag trisikol.

Ginalauman nga mabuksan ang inner lane sang flyover buwas, suno kay Oropel.