Estudyante sa Pototan naglisensya sa klase agud mag-obra sa poultry farm para may ibakal sang bulong sang iya iloy

Read Time:1 Minute, 37 Second

ILOILO – Luyag nga buligan sang 14-anyos nga solterito ang iya nagamasakit nga iloy rason nga naglisensiya siya nga ma-absent sa klase agud mag-obra sa poultry farm sa Palanguia, Pototan.

Naga-istar sa Quintin Salas, Jaro ang iloy sang solterito, samtang sa Pototan naman siya nagatiner kag naga-eskwela bilang Grade 8 student sa Palanguia National High School.

Suno kay Boyboy, nagpauli siya sa Quintin Salas sang nagligad nga adlaw kag naabtan nga duha ka adlaw na nga indi makabangon ang iya iloy tungod nagamasakit. Sa iya pagpangusisa, posible nga nasobrahan lang sa kakapoy ang iya iloy.

Ini ang nagtulod kay Boyboy agud mag-absent anay sa klase kag ma-harvest sang itlog sa poultry farm kag makapadala sang kwarta sa iya iloy para ibakal sang bulong.

Student-athlete si Boyboy. Naga-istar naman siya sa iya amo sa Pototan nga nagapanag-iya sang poultry farm kag nagasuporta man sa iya pag-eskwela.

Ikaduha sa lima ka mag-ulutod si Boyboy.

Madamo ang natandog sa Facebook post sang maestra sa Pototan sang nabasahan ang kaundan sang excuse letter ni Boyboy.

Gin-post ni Maam Nelly Margarse Chiquito, Teacher II sa Palanguia NHS, ang excuse letter sang estudyante nga ma-absent siya subong nga adlaw agud nga maka-“harvest” para makabakal sang bulong sang iya iloy.

Suno kay Maam Nelly, gusto niya gid kuntani nga mag-eskwela ang tanan nga estudyante.

Pero wala man siya sang mahimo kundi i-konsiderar ang hingyo sang estudyante nga naghatag sang excuse letter tungod sa iya rason. Suno sa teacher, nakamuno na gid man ang estudyante nga na-ospital ang iya iloy.

“Harvest ja ka itlog Kay sa poultry farm Ang bata ga work,” suno kay Maam Nelly.

Gina-encourage naman ni Maam Nelly ang mga estudyante nga wala sang problema kapareho sang iya estudyante nga nagpadala sang excuse letter nga magtuon sang maayo tungod handum man lang sang ila ginikanan nga makatapos sila sa pagtuon.