Lalaki patay sang nabungguan sang truck van sa taytay sa Guimbal

ILOILO — Dead-on-arrival ang wala pa makilala nga lalaki sang nabungguan sang truck van sang nagtabuk sa Virginia bridge nga sakop sang Brgy. Bongol San Vicente, Guimbal pasado las-6 kagab-i

Suno kay Police Staff Sergeant Jovan Pastrana, imbestigador sang Guimbal Municipal Police Station wala pa sila sang identity sang lalaki nga ginabanta naga-edad sang 25-anyos.

Masami makit-an nga nagaliho-liho kag nagalakat pabalik-balik sa Miagao kag Guimbal ang lalaki, suno sa police.

Pakadto sa direksyon sang Miagao ang truck van sang gulpi nagtabok sa tunga sang taytay ang lalaki kag nabungguan.

Nakaagum sang patal nga pilas sa ulo ang lalaki nga gintunaan sang iya kamatayon.

Ginabanta 5’2 ang kataason sang biktima, may tattoo nga barbed wire sa tuo nga abaga.

Yara sa morgue sang Guimbal Hospital ang bangkay sang lalaki samtang detained sa Guimbal Police Station ang driver sang truck van.