Nagapadalagan sa pagka-kapitan sa Molo gindagdagan sang Comelec sang show cause order
ILOILO CITY – Gindagdagan sang showcause order sang Commission on Elections (Comelec) ang kandidato sa pagka-kapitan sa Brgy. San Pedro, Molo tungod ginreklamo sang premature campaigning.
Suno kay Mr. Jonathan Sayno, election assistant II sang Iloilo City Comelec, Setyembre 27 ginpadala ang showcause order kay Lornie Jordan nga kandidato sa pagka-kapitan sa Brgy. San Pedro.
Ginkumpirmar ni Sayno nga si incumbent Punong Barangay Carl John Lapascua ang nagreklamo batuk kay Jordan tungod ginpahayag niya nga yara si Jordan sa gathering sang mga benepisyaryo sang DOLE-Tupad sa barangay. Nalakip sa ginpadala nga reklamo sa City Comelec ang ebidensya nga yara sa amo nga pagtililipon si Jordan.
Ginhatagan sang tatlo ka adlaw agud magsumiter sang iya sabat si Jordan sugod nga nabaton ang showcause order.
Tatlo ang nagabunggu-anay sa nasambit nga position sa Brgy. San Pedro lakip na si Lapascua.
Sang damlag lang, walo man ka kandidato sa Brgy. Obrero, Lapuz ang gindagdagan sang showcause order sang Comelec tungod ginreklamo sang premature campaigning pero lunsay nakasabat na. –via Firingline