2 ka pick-up, 2 ka taxi, 2 ka motorsiklo nasalakay sang water tanker sa idalum sang Ungka flyover
ILOILO— Duha ka pick up, duha ka motorsiklo kag duha ka taxi ang nasalakay sang water tanker truck sa idalum sang Ungka Flyover sa Pavia las-6:20 kagab-i, Oktubre 2.
Suno kay PSSG Ronnie Labiaga, imbestigador sang Pavia Municipal Police Station, halin sa Tacas, Jaro ang water tanker kag mapadulong kun tani sa Iloilo City.
Layo pa lang sa intersection suno sa police, nagsinyas na ang traffic aide nga mag-untat ang water tanker pero nagdiretso ini tungod indi mag-gana ang break suno sa driver.
Sa imbestigasyon, nasaga-id sang tanker ang pick up nga yara sa wala nga lane nga halin man sa Jaro kag nadalasa ang duha ka motorsiklo sa unahan sang pick up.
Magluwas sini, naigo pa gid sang tanker ang ulihi nga porsyon sang taxi sa una sang duha ka motorsiklo. Nagbunggo suno sa police ang taxi sa ulihi nga porsyon sang isa pa gid ka taxi nga padulong sa Iloilo City.
Pagkatapos sini, nalab-ut pa gid sang tanker ang unahan nga porsyon sang pick-up nga halin sa Pavia kag nag-left turn padulong sa Tacas, Jaro.
Nag-untat ang tanker tungod sa pagkarambola sang mga salakyan, suno sa police.
Nakaagum sang pilas ang tatlo ka sakay sang motorsiklo.