P4.8 million nga balor sang suspected shabu na-recover sa drug buy bust operation sa Calinog

ILOILO — P4.8 million nga balor sang suspected shabu ang na-recover sa drug buy bust operation sa Brgy. Poblacion Delgado, Calinog pasado las-8 kagab-i, Oktubre 12.

Ginkilala ang subject kay Jomarie Celestial, 30-anyos, residente sang nasambit nga barangay.

Suno kay Police Major Myles Dieron, hepe sang Calinog Municipal Police Station, masobra isa ka bulan ang monitoring nila sa subject tubtob nadakpan.

Na-recover sa subject ang 22 ka bulto kag apat ka sachets sang suspected shabu nga ginabanta nagabug-at sang 600 grams kag may standard drug price nga P4,800,000.

Ginpahayag sang police nga may nagabagsak lang sang illegal drugs sa subject kag gina-distribute sa iya mga parokyano nga halin pa sa Iloilo City.

Indi magtu-ad ang subject kun sin-o kag diin naghalin ang supply sang illegal drugs, suno sa police.

Preso sa Calinog Police Station ang subject.