Menor-de-edad patay sang natiruhan sa nagluntad nga rambol sa City Proper

ILOILO CITY—Patay ang 16-anyos nga lalaki nga ginkilala kay alyas Mikey sang natiruhan sa nagluntad nga rambol malapit sa seawall sa Rizal Pala-Pala I, las-12:10 kahapon sang kaagahon, Oktubre 15

Ini ang ginkumpirmar ni PCapt. Roque Gimeno, Chief of Police sang Iloilo City Police Station 1.

Antes matabo ang pagpangluthang, naga-inum-inom sa lugar ang biktima upod ang apat pa niya ka kaupdanan samtang nagaselebrar sang kaadlawan sang iya barkada.

Base sa panaysayon sang mga kaupdanan ni alyas Mikey, hinali lang sila ginpalapitan sang 15 ka mga kalalakihan nga kalabanan mga menor-de-edad kag ginhabuyan sang botelya.

Diri kag nag-umpisa ang rambol sa tunga sang duha ka grupo tubtob nga may nabatian nga lupok sa lugar.

May pilas sa idalum nga porsyon sang iya tiyan ang biktima nga ginhalinan sang iya kamatayon.

Suno kay Gimeno, nakapalagyo ang 15 ka mga kalalakihan pagkatapos sang natabo.

Sa nagapadayon nga hot pursuit operation sang kapulisan, duha na ang nag-surrender kag lunsay mga menor-de-edad.

Suno kay Gimeno, suspect na ang pagkabig sa 15 ka mga kalalakihan nga nag-umpisa sang kinagamo.

Nagapadayon pa ang pag-ayam sang mga police sa 13 ka iban pa nga nakapalagyo.

PA-IMBESTIGARAN NI MAYOR JERRY TREÑAS

Ginapa-imbestigaran ni Iloilo City Mayor Jerry Treñas ang kamatayon sang 16-anyos nga lalaki sa Rizal Pala-Pala I, City Proper.

Suno kay Treñas, “I am instructing the PNP and PSTMO to investigate the killing of a minor in City Proper. These matters should not be allowed in the city.”

Base sa report ni PCapt. Roque Gimeno, Chief of Police sang City Proper Police Station, natiruhan ang menor-de-edad nga si Mikey sa nagluntad nga rambol malapit sa seawall sa nasambit nga barangay.

Upod sang biktima ang apat niya ka abyan sang ginpalapitan sang 15 ka mga kalalakihan kag ginhabuyan sang botelya. Diri na nag-umpisa ang rambol sa tunga sang duha ka grupo tubtob nga may nabatian nga lupok sang pusil sa lugar, suno sa police.