Driver sang awto nga nakabunggo sa mga masitera sa Diversion bridge nagpadulong sa Iloilo City Hall kag nagpangayo sang pasaylo

ILOILO CITY—Personal nga nagpadulong sa Iloilo City Hall ang driver sang salakyan nga nakabunggo sa mga masitera sa Diversion Bridge, pasado las-9 sa gab-i sang Oktubre 16, kag nagpangayo sang pasaylo sang nagkalatumba kag nagkalabuka ang concrete flower pots.

Lalaki ang driver sang salakyan, ginabanta sa 30s ang pang-edaron, professional, kag nagapauli sa isa ka barangay sa Mandurriao.

Ini suno kay Engr. Niel Ravena, head sang Task Force Beautification.

Ginkumpirmar man si Ravena nga Vios ang salakyan sang lalaki nga una na gin-identify sang mga nakakita sa lugar.

Positibo nga nahukas ang bumper sang salakyan tungod sa pagkabunggo kag nawigit sa dalan.

Halin sa area malapit sa University of the Philippines Visayas – Iloilo City ang driver kag mapauli na sa ila balay sa Mandurriao rason nga nakalabay siya halin sa Infante palusot sa Diversion Bridge.

Base sa panaysayon sang driver, antes natabo ang insidente, nagdali-dali siya sakay sa iya nga salakyan kag naghingagaw pauli tungod gin-atake siya sang asthma.

Gintuyo sang driver nga padasigon ang pagpadalagan tungod ginalagas niya nga makainom siya sang bulong pero wala na nakontrol ang manibela.

Gin-ako sang driver nga tungod sa kakulba rason nga gindiretso na lang niya ang pagpadalagan sang salakyan.

Gina-calculate pa sang Task Force Beautification ang kantidad sang kahalitan kag pabayran sa driver ang damage.