Tricycle driver nasapwan patay sa Banuyao, La Paz
ILOILO CITY — May mga pilas sa ulo ang bangkay sang lalaki sang nasapwan sa Banuyao, La Paz kahapon sang aga, Oktubre 18.
Ginkilala sang iya pamilya ang bangkay kay Ronnie Suficiencia, 38-anyos sang McArthur, La Paz.
Suno kay barangay kagawad nancy Ledesma sang Banuyao, La Paz, may residente malapit sa lugar nga nakakita sang tricycle nga madugay na naga-park sa lugar gani ginkadtuan kag nakita ang bangkay.
Gilayon nga nagpahibalo suno sa iya sa barangay kapitan ang residente kag gin-report man sa pulis.
Ginpahayag ni Ledesma nga dead end na ang lugar kag wala masami ginalabayan sang mga salakyan.
Ginpahayag naman sang residente nga si alyas inday, mga las 6 sang aga kahapon sang nakita niya nga naglabay ang tricycle sa lugar.
Nakita man niya ang tricycle nga naga-park sa lugar las 8 sang aga sang nagpa-check up sila sang iya bata. Las 10 sang aga, suno sa iya sang may naglabay nga estudyante kag naghambal nga may tawo nga nagahigda malapit sa tricycle gani ginpalapitan sang iya bana kag nakita nga duguon ang lalaki kag wala na nagahulag.
Ginhingagaw sang iya bana nga tawgan ang ila barangay kapitan nga amo naman ang nag-report sa pulis.
GINAPATIHAN GINHOLD-UP
Nagapati ang pamilya sang tricycle driver nga gin-okupar ang tricycle sang ila himata, gindala sa maligwin nga lugar kag ginhold-up.
Natingala ang tiya ni Ronnie kun ngaa nakabiyahe sa amo nga lugar ang iya hinablos.
Nagasuksok sang alahas ang iya hinablos kun magbiyahe gani may posibilidad nga ginhold-up siya.
Wala man siya sang may nadumduman nga kontra sang iya hinablos. Nakibot na lang ang tiya sang nagpahibalo ang nobya ni Ronnie nga naga-ring lang ang cellphone sang iya hinablos kag hungod man nga ginapatay.
Ginkumpirmar naman sang utod nga si Daisy Pauchano nga wala na sang alahas nga nasuksok ang iya magulang sang nasapwan.
Las 6 sang aga sang naghalin si Ronnie sa ila balay kag nakita pa niya nga may suksok nga kulintas, pulseras kag singsing.
Magluwas sa pagbiyahe sang tricycle, ginpabutyag ni Daisy nga nagapanag-iya man sang boarding house ang iya magulang. Soltero suno sa iya ang magulang gani wala sang may ginagastuhan nga iban.
