Ikaapat nga Filipino fatality sa Israel-Hamas war taga-Maasin, Iloilo
ILOILO – Kumpirmado nga napatay sa pag-atake sang Hamas sa southern Israel sang Oktubre 7 ang Ilongga OFW nga si Mary Grace Prodigo-Cabrera sang Maasin nga nagatrabaho nga caregiver sa Kibbutz Be’eri, ang komunidad nga malapit lang sa Gaza sa diin naghalin ang mga militante.
Suno sa Philippine Embassy sa Israel, nag-e-mail ang Interpol sang Oktubre 18 nga nagpabalo nga nakilala ang bangkay paagi sa fingerprint records, pero wala na naghatag sang dugang nga detalye kun paano napatay ang Pinay.
Ginpabutyag naman ni Maasin Mayor Francis Amboy nga ginahulat nila ang official statement sang Department of Foreign Affairs may kaangtanan sa natabu sa iya kasimanwa. Nagpakig-angut ang alkalde sa DFA, Department of Migrant Workers kag OWWA nga naghatag sa iya sang initial nga impormasyon.
“Initially daw gina-confirm nila (DFA, DMW, OWWA) but as a matter of protocol sila daw ang mapaguwa sang statement,” ang pahayag ni Mayor Amboy.
Ginpasalig sang alkalde nga himuon niya ang tanan agud mabuligan ang pamilya ni Grace.
Sa record sang embahada sa Israel as of October 18, apat ka Filipinos na ang kumpirmado nga napatay sa natabu nga pag-atake, may duha pa ka missing, kag may isa nga padayon ginabulong sa ospital. —via Firingline/Philippine Embassy in Israel
