Balay sa Tigbauan nasunog tungod sa gin-charge nga battery sang e-bike
ILOILO– Naglupok nga battery sang gin-charge nga E-bike ang ginatudlo rason sa pagkasunog sang balay sa Brgy. 4, Tigbauan sang Oktubre 20 ang gab-i.
Ini suno kay FO1 Rayvie Dacullo, deputy fire marshall sang Tigbauan Fire Station, base sa initial nga imbestigasyon.
Ginpahayag ni Dacullo nga gin-ako sang tag-iya sang balay nga nalipatan niya nga gabuton ang gin-charge nga battery sang e-bike tungod masako siya sa pagbiyahe.
Antes ang sunog suno kay Dacullo, nakabati sang lupok ang mga residente tubtob nga nagkalayo ang balay kag madasig nga naglapta tungod human sa light materials.
Gindugang niya nga pagbalik nila sa area kaina sang aga, nakita nila nga naka-charge pa ang battery sang e-bike.
May mga impormasyon naman nga ginhungod sunog ang balay pero gin-athag ni Dacullo nga indi ini matuod.
Naglab-ut sa P60,000 ang balor sang kahalitan sang sunog.
